Amazon: ఆర్థికమాంద్యం భయాలు ఇంకా వెంటాడుతూనే ఉన్నాయి. చిన్న కంపెనీల నుంచి దిగ్గజ కంపెనీల వరకు అన్నీ కుదేలవుతున్నాయి. ఇప్పటికే చాలా కంపెనీలు పెద్ద ఎత్తున ఉద్యోగులను తొలగించాయి. ఉన్న ఉద్యోగులు కూడా జాబ్ ఉంటుందో .. లేదో అని ఆందోళనకు గురవుతున్నారు. ఈకామర్స్ దిగ్గజం అమెజాన్ ఇటీవలే పెద్ద ఎత్తున ఉద్యోగులకు ఉద్వాసన పలికింది. తాజాగా మరోసారి ఉద్యోగులకు షాక్ ఇచ్చేందుకు రెడీ అవుతుంది.
ఆర్థికమాంద్యం పెరుగుతుండడంతో అమెజాన్ త్వరలో పెద్ద ఎత్తున ఉద్యోగులను తొలగించే యోచనలో ఉందట. దాదాపు 9 వేల మందిని తొలగించేందుకు సన్నాహాలు చేస్తుందట. ట్విచ్, అమెజాన్ అడ్వటైజింగ్, ఏడబ్ల్యూఎస్ విభాగాలకు చెందిన ఉద్యోగులను తొలగించనుందట. ఇక ఈ లేఆఫ్స్కు సంబంధించి ఇప్పటికే అమెజాన్ సీఈవో ఆండీ జెస్సీ ఉద్యోగులకు మెయిల్ పంపించారట. ‘‘ఉద్యోగులను తొలగించడం కష్టంతో కూడుకున్నది. కానీ సంస్థ దీర్ఘకాలిక విజయాలు సాధించాలంటే కఠిన నిర్ణయాలు తీసుకోక తప్పదు’’ అని మెయిల్లో పేర్కొన్నారట.
ఈఏడాది జనవరిలోనే అమెజాన్ 18వేల మంది ఉద్యోగులను ఇళ్లకు సాగనంపింది. మళ్లీ రెండు నెలలకే 9 వేలమందిని తొలగించేందుకు సన్నాహాలు చేస్తుండడంతో ఉద్యోగులు ఆందోళనకు గురవుతున్నారు.