Sunil Gavaskar: నాటు నాటు.. ఎక్కడికి వెళ్లినా ఇదే సాంగ్ వినిపిస్తోంది. సోషల్ మీడియాలో, టీవీల్లో రచ్చ రచ్చ చేస్తోంది. చివరికి క్రికెట్ స్టేడియంలో కూడా ఈ సాంగ్ దుమ్మురేపుతోంది. ఈ పాటకు క్రికెట్ మాజీ దిగ్గజం సునీల్ గవాస్కర్ కూడా స్టెప్పులేసి క్రికెట్ స్టేడియంలో రచ్చ చేశారు.
సోమవారం అహ్మదాబాద్ వేదికగా జరిగిన ఆఖరి టెస్ట్ ఐదో రోజు మ్యచ్ ప్రారంభానికి ముందు గవాస్కర్ మీడియాతో మాట్లాడారు. నాటు నాటు సాంగ్కు ఆస్కార్ అవార్డ్ దక్కడం ఆనందంగా ఉందని అన్నారు. ఆర్ఆర్ఆర్ చిత్ర బృందానికి అభినందనలు తెలియజేశారు. తాను కూడా ఈ సినిమాను చూశానని.. ఎంతో అద్భుతంగా ఉందని కొనియాడారు.
అలాగే నాటునాటు సాంగ్కు స్టెప్పులేసి అదరగొట్టారు. ఇందుకు సంబంధించిన వీడియోను స్టార్ స్పోర్ట్స్ తెలుగు ట్విట్టర్లో షేర్ చేసింది. ‘‘మన తెలుగు పాట నాటు నాటుకు ఆస్కార్ రావటం గర్వకారణం. ఈ అరుదైన సందర్భంపై లెజెండ్ సునీల్ గవాస్కర్, స్టార్ స్పోర్ట్స్ తెలుగు టీమ్ సంతోషాన్ని మీరు చూసేయండి’’ అంటూ రాసుకొచ్చింది. ప్రస్తుతం ఈ వీడియో సోషల్ మీడియాలో వైరలవుతోంది.