Earthquake: భూకంపం ధాటికి టర్కీ, సిరియా దేశాలు చిందరవందరమయ్యాయి. ఎటుచూసినా భవనాల శిథిలాలు.. శవాల దిబ్బలను తలపిస్తున్నాయి. బాధితుల అర్థనాదాలు గుండెల్ని పిండేస్తున్నాయి. శిథిలాల కింద చిక్కుకొని వేలాది మంది సాయం కోసం వేచిచూస్తున్నారు. ఇక మరోవైపు విపరీతమైన చలి ఉండడంతో వణికిపోతున్నారు.
సిరియాలోని అలెప్పోలో హృదయవిదారకరమైన ఘటన చోటుచేసుకుంది. శిథిలాల కిందే ఓ తల్లి బిడ్డకు జన్మనిచ్చి కన్నుమూసింది. సహాయక సిబ్బంది పాప అరుపులు విని శిథిలాలను తొలగించి రక్షించారు. అనంతరం ఆసుపత్రికి తరలించారు. ప్రస్తుతం ఆ పాప ఆరోగ్యం నిలకడగా ఉన్నట్లు తెలుస్తోంది. ఈ ఘటనకు సంబంధించి ఓ వీడియో సోషల్ మీడియాలో వైరలవుతోంది.