Fire accident: హైదరాబాద్లోని చిక్కడపల్లిలో భారీ అగ్నిప్రమాదం జరిగింది. విఎస్టీలోని ఓ గోదాంలో ఒక్కసారిగా మంటలు చెలరేగాయి. ఆ ప్రాంతమంతా దట్టమైన పొగలు వ్యాపించాయి. గోదాంలో ఉన్న శుభకార్యాలకు ఉపయోగించే డెకరేషన్ సామాగ్రి మంటల్లో పూర్తిగా కాలిపోయాయి. గోదాం పరిసరాల్లో బస్తీలు ఉండడంతో స్థానికులు భయాందోళనలకు గురయ్యారు.
స్థానికుల సమాచారం మేరకు అగ్నిమాపక సిబ్బంది, పోలీసులు సంఘటనా స్థలానికి చేరుకొని మంటలను ఆర్పుతున్నారు. నాలుగు ఫైర్ ఇంజిన్ల సాయంతో మంటలను అదుపు చేస్తున్నారు. షార్ట్ సర్క్యూట్ కారణంగానే మంటలు చెలరేగినట్లు అధికారులు ప్రాథమికంగా నిర్దారణకు వచ్చారు. ఘటనపై పోలీసులు కేసు నమోదు చేశారు.
కాగా, ఇటీవల సికింద్రాబాద్లోని డెక్కన్ మాల్లో అగ్నిప్రమాదం జరిగిన విషయం తెలిసిందే. దాదాపు మూడు రోజుల పాటు భవనంలో మంటలు చెలరేగాయి. ఆ భవనంలో ముగ్గురి ఆచూకీ గల్లంతు కాగా.. ఒకరి మృతదేహం లభ్యమైంది.