RRR: జేమ్స్ కామెరూన్. పేరు కాదిది హాలీవుడ్ బ్రాండ్. ఆయన సినిమా తీశారంటే.. ప్రపంచ రికార్డులు బద్దలు కావాల్సిందే. లేట్ గా సినిమాలు తీసినా.. లేటెస్ట్ గా తీస్తుంటారు. ఇటీవలి అవతార్ మూవీ కామెరూన్ చెక్కిన శిల్పమే. అంతటి ఆయన.. మన జక్కన్న సినిమాకు ఫిదా అయిపోయారు. RRR చిత్రాన్ని చూసిన జేమ్స్ కామెరూన్ కు ఆ మూవీ తెగ నచ్చేసిందట. ఎంతగా నచ్చిందంటే.. సినిమా చూసొచ్చాక తన భార్యతో కలిసి మరోసారి సినిమా చూసేంతగా. RRRను కామెరూన్ రెండుసార్లు చూశారంటే మాటలా.
ఓ హాలీవుడ్ వేడుకలో వాళ్లిద్దరూ కలిశారు. కాసేపు మాట్లాడుకున్నారు. ఆర్ఆర్ఆర్ ను రాజమౌళి తెరకెక్కించిన తీరును జేమ్స్ కామెరూన్ ప్రశంసించారు. కామెరూన్ అంతటివాడే తన సినిమాను పొగడంతో రాజమౌళి గాల్లో తేలిపోతున్నారు. ఆ అనుభూతిని ట్విటర్ లో పంచుకున్నారు. ఫోటోలు షేర్ చేశారు.
‘‘ప్రముఖ దర్శకుడు జేమ్స్ కామెరూన్ ‘ఆర్ఆర్ఆర్’ చూశారు. ఆయనకు ఈ సినిమా ఎంతో నచ్చింది. తన భార్యను కూడా ఈ చిత్రాన్ని చూడాలని ఆయన కోరారు. ఆమెతో కలిసి మరోసారి సినిమా చూశారు’’ అని తెలిపిన రాజమౌళి తన ఆనందానికి హద్దులు లేవంటూ ట్వీట్ చేశారు.
‘‘మీరు మాతో 10 నిమిషాలు గడిపారంటే నేను నమ్మలేకపోతున్నాను. మీరు ‘ఆర్ఆర్ఆర్’ను విశ్లేషించి చెప్పడాన్ని జీవితంలో మర్చిపోలేను’’ అంటూ ట్విటర్ లో థ్యాంక్స్ చెప్పారు రాజమౌళి.
ఇప్పటికే గోల్డెన్ గ్లోబ్ అవార్డు దక్కించుకున్న ఆర్ఆర్ఆర్.. మరో ప్రతిష్టాత్మక పురస్కారం అందుకుంది. ఉత్తమ విదేశీ భాష చిత్రంగా క్రిటిక్స్ ఛాయిస్ అవార్డు వరించింది.