Hyderabad tops the list of home sales: దేశంలోని ఇతర ప్రధాన నగరాలతో పోలిస్తే… ఇళ్ల అమ్మకాల్లో హైదరాబాద్ దూసుకుపోతోంది. 2022లో దేశంలోని అన్ని నగరాల కన్నా ఎక్కువగా… హైదరాబాద్‌లోనే ఇళ్లు అమ్మడుపోయాయి. 2021తో పోలిస్తే హైదరాబాద్‌లో ఇళ్ల విక్రయాల్లో ఏకంగా 87 శాతం వృద్ధి నమోదైంది. దేశంలో ఇదే అత్యధిక వృద్ధి రేటు. హైదరాబాద్‌పై అన్ని ప్రాంతాల ప్రజలకూ ఉన్న మక్కువను… ఇళ్ల విక్రయాలే చాటి చెబుతున్నాయి.

కరోనా ఎఫెక్ట్, వడ్డీ రేట్ల పెరుగుదలతో పాటు రియలెస్టేట్ రంగానికి రెక్కలు రావడంతో… 2021లో హైదరాబాద్‌లో 51,500 యూనిట్లు లాంచ్ అయినా… 25,406 ఇళ్లు మాత్రమే అమ్ముడుపోయాయి. 2022లో మాత్రం రికార్డు స్థాయిలో 68 వేల యూనిట్లు లాంచ్ అయితే, అందులో 47,487 ఇళ్లు అమ్ముడయ్యాయి. 2021తో పోలిస్తే 2022లో ఇళ్ల లాంచింగ్‌లో 32 శాతం వృద్ధి నమోదైంది.

2022లో ఇళ్ల విక్రయాల్లో హైదరాబాద్ 87 శాతం వృద్ధి సాధించగా… 62 శాతం వృద్ధితో ఆ తర్వాతి స్థానంలో కోల్‌కతా ఉంది. ఢిల్లీ, పుణేల్లో ఇళ్ల విక్రయాలు 59 శాతం చొప్పున వృద్ధి చెందగా, బెంగళూరులో 50 శాతం, ముంబైలో 44 శాతం, చెన్నైలో 29 శాతం వృద్ధి నమోదైంది.

ఇక 2021లో దేశం మొత్తం 2,36,700 ఇళ్లు ప్రారంభం కాగా… 2022లో 51 శాతం వృద్ధితో 3,57,600 యూనిట్లు లాంచ్ అయ్యాయి. అయితే 2014తో పోలిస్తే మాత్రం 2022లో
లాంచింగ్‌లు తక్కువే. 2014లో దేశంలో ఏకంగా 5.45 లక్షల యూనిట్లు ప్రారంభమయ్యాయి. ఆ ఏడాది లాంచింగ్స్‌లో ముంబై, హైదరాబాద్‌ పోటీ పడ్డాయి. అప్పట్లో ఈ రెండు నగరాల వాటానే ఏకంగా 54 శాతంగా నమోదైంది.

2021లో దేశంలోని 7 ప్రధాన నగరాల్లో 2,36,500 ఇళ్లు అమ్ముడుపోగా, 2022లో 54 శాతం వృద్ధి చెంది… 3,64,900 గృహాలు అమ్ముడయ్యాయి. 2014 తర్వాత మళ్లీ 2022లోనే ఎక్కువగా ఇళ్లు అమ్ముడుపోయాయి.

Share

• 
• 
• 
• 
• 
•