Google Maps : తెలియని ప్రదేశాలకు మనం ప్రయాణించాలన్నా, లేదంటే త్వరగా గమ్య స్థానానికి చేరడానికి షార్ట్ కట్లో రూట్స్లో వెళ్లాలన్నా టక్కున మన మెదడుకి ముందుగా గుర్తుకొచ్చేది గూగుల్ మ్యాప్స్. అందుకే ప్రతి ఒక్కరూ దీనినే ఎక్కువగా వినియోగిస్తుంటారు. అత్యంత ప్రజాదరణ పొందిన ఈ గూగుల్ మ్యాప్స్ యాప్ ఎప్పటికప్పుడు వినియోగదారులకు మరింత చేరువయ్యేలా, ఈ యాప్ వినియోగం సులభతరంగా ఉండేలా తన సేవల్ని మరింత విస్తరిస్తూ పోతోంది. యూజర్ల అవసరాలకు అనుగుణంగా ఎప్పటికప్పుడు సరికొత్త ఫీచర్లను తీసుకొస్తోంది. అందుకే గూగుల్ మ్యాప్స్కు ఇంతటి ఆదరణ లభిస్తోంది.
ఇప్పటికే ఈ ఏడాది గూగుల్ మ్యాప్స్లో రియల్ టైమ్ లొకేషన్ షేరింగ్, ఫ్యూయెల్ సేవింగ్, లాక్ స్క్రీన్పైనే లొకేషన్ వంటి పలు కొత్త ఫీచర్లను తీసుకొచ్చిన గూగుల్.. తాజాగా మరికొన్ని కొత్త అప్డేట్స్ను యూజర్లకు అందించింది. గూగుల్ మ్యాప్స్తో పాటు స్ట్రీట్ వ్యూ, గూగుల్ ఎర్త్లో మేజర్ అప్డేట్స్ను తీసుకొచ్చింది.
ఈ మేజర్స్ అప్డేట్స్ సాయంతో కాలంలో వెనక్కి వెళ్లొచ్చు. అవును నిజం. ప్రస్తుతం ఓ ప్రదేశాన్ని ఎంచుకుని, అది 80 ఏళ్ల క్రితం వరకు ఎలా ఉంటుందో ఈ ఫీచర్ ద్వారా స్పష్టంగా చూసేలా వెసులుబాటును కల్పించింది గూగుల్. 1930 నుంచి ఇప్పటి వరకు బెర్లిన్, లండన్, పారిస్ వంటి నగరాల ప్రత్యేక ప్రదేశాలను ఇందులో చూడొచ్చు.
హిస్టారికల్ ఇమేజ్ – గూగుల్ ఎర్త్ లేదా గూగుల్ మ్యాప్స్లో హిస్టారికల్ ఇమేజరీ అనే ఫీచర్ను జోడించారు. దీన్ని టైమ్ మెషీన్ ఫీచర్ అని కూడా అనొచ్చు. ఈ ఫీచర్ వెబ్తో పాటు మొబైల్నూ ఉంటుంది. దీని సాయంతో యూజర్స్ టైమ్ ట్రావెల్ చేయొచ్చు అన్న మాట. అంటే గతంలో మనం ఎంచుకున్న ప్రాంతం ఎలా ఉంది, ఇప్పుడు ఎలా ఉందో తెలుసుకోవచ్చు.
ALSO READ : సోనీ నుంచి 85 అంగుళాల బ్రేవియా టెలివిజన్
దాదాపు 80 సంవత్సరాల క్రితం వరకు సదరు ప్రాంతాలు ఎలా ఉంటాయో ఇది మనకు చూపిస్తుంది. ఆ ప్రాంతాలు ఎలా అభివృద్ధి చెందుతూ వచ్చాయో చూపిస్తుంది. మొదట్లో ఇది గూగుల్ ఎర్త్ ప్రో పెయిడ్ వెర్షన్లో మాత్రమే అందుబాటులో ఉండేది. కానీ ఇప్పుడు వెబ్, మొబైల్ ప్లాట్ఫామ్స్లో ఉంది. సాటిలైట్ ఇమేజ్ ద్వారా వీటిని చూడొచ్చు. దశాబ్దాలుగా వివిధ ప్రాంతాలు, నగరాలు, అక్కడి ప్రకృతి దృశ్యాలు, ఇతర ఇన్ఫ్రాస్ట్రక్చర్ ఎలా అభివృద్ధి చెందాయో, రూపాంతరం చెందాయో చూపిస్తుంది.
స్ట్రీట్ వ్యూ ఫీచర్ ఎక్స్ప్యాన్షన్ – స్ట్రీట్ వ్యూ ఇమేజరీని ప్రస్తుతం ఎక్స్ప్యాన్షన్ చేసి తీసుకొచ్చింది గూగుల్. భవిష్యత్తులో స్ట్రీట్ వ్యూ కవరేజీని మరింత విస్తరించాలని గూగుల్ లక్ష్యంగా పెట్టుకుని దీన్ని అప్డేట్ చేస్తోంది. దాదాపు 80 దేశాలను ఇది కవర్ చేస్తుంది. అక్కడి ప్రాంతాలను తొలిసారి తీసిన ఫొటోలను డీటెయిల్డ్గా చూపిస్తుంది.
ఏఐ ఆధారిత టూల్తో మరింత స్పష్టంగా – మూడో ఫీచర్గా ఇమేజ్ నాణ్యతను పెంచేలా ఏఐ ఆధారిత టూల్ను తీసుకొచ్చింది. ఈ ఏఐ-ఆధారిత సాంకేతికత ద్వారా గూగుల్ ఎర్త్, మ్యాప్స్లోని చిత్రాల క్వాలిటీని మరింత మెరుగుపరిచి చూపిస్తుంది. క్లౌడ్ స్కోర్ అనే ఏఐ మోడల్ టూల్ను ఉపయోగించి, ఫొటోస్లోని మేఘాలు, పొగమంచు వంటి వాటిని తీసివేయగలదు. ఫొటోస్ను గతంలో కన్నా మరింత షార్ప్గా, స్పష్టంగా చూపిస్తుంది.
అదే సమయంలో ప్రకృతికి సంబంధించిన ఫొటోలను ఉన్నది ఉన్నట్టుగా అందంగా చూపిస్తుంది. అర్బన్ ఎన్విరాన్మెంట్స్, నేచురల్ ల్యాండ్స్కేప్స్, రిమోట్ లొకేషన్స్ను బాగా చూపిస్తుంది. మొత్తంగా ఈ అప్డేట్స్ను ఉపయోగించుకోవాలనుకునే వారు గూగుల్ మ్యాప్స్ లేదా గూగుల్ ఎర్త్లోకి వెళ్లి చూడాలనంటుకున్న ప్రాంతం లేదా ప్రదేశాన్ని సెర్చ్ చేయాలి.