Raw Coconut: ఉష్ణ మండల ప్రాంతాల్లో ఎక్కువగా దొరికేవి కొబ్బరికాయలు. ఇవి పోషకాల పవర్ హౌస్ అని చెప్పుకోవచ్చు. పచ్చికొబ్బరిని ప్రతిరోజూ తినడం వల్ల ఎన్నో ఆరోగ్య ప్రయోజనాలు ఉన్నాయి. పోషకాహార నిపుణులు చెబుతున్న ప్రకారం పచ్చి కొబ్బరిలో ఫైబర్ అధికంగా ఉంటుంది. కాబట్టి మధుమేహం ఉన్నవారు కూడా పచ్చికొబ్బరిని తినవచ్చు. ప్రతిరోజు ఉదయం పరగడుపున పచ్చికొబ్బరిని తింటే ఆకలి అధికంగా వేయదు. పేగుల పనితీరు కూడా మెరుగుపడుతుంది. బరువు తగ్గడం జరుగుతుంది. మలబద్ధకం వంటి సమస్యలు కూడా రాకుండా ఉంటాయి.
పరగడుపున కొబ్బరి తింటే
కొబ్బరి ముక్కను ప్రతిరోజూ ఉదయం లేవగానే తినేందుకు ప్రయత్నించండి. ఇది ఆహారం నుండి కార్బోహైడ్రేట్లను శరీరం శోషించుకోవడం నెమ్మదించేలా చేస్తుంది. కాబట్టి రక్తంలో చక్కెర స్థాయిలు పెరగవు. మధుమేహాన్ని అదుపులో ఉండాలంటే మీ ఆహారంలో కొబ్బరి ముక్కను కచ్చితంగా భాగం చేసుకోవాలి. కొబ్బరిలో మన శరీరానికి అవసరమైన మాంగనీస్, విటమిన్ సి, మెగ్నీషియం వంటివి అధికంగా ఉంటాయి. ఇవన్నీ కూడా మధుమేహులకు మేలు చేసేవే.
బరువు తగ్గేందుకు
బరువు తగ్గాలనుకునే వారికి పచ్చి కొబ్బరి మంచి ఎంపిక. దీనిలో ఫైబర్ అధికంగా ఉంటుందని ముందే చెప్పుకున్నాం. అలాగే గ్లైసెమిక్ ఇండెక్స్ తక్కువే. కాబట్టి బరువు తగ్గేందుకు ఇది ఎంతో సహాయపడుతుంది. పచ్చి కొబ్బరి చిన్న ముక్క తింటే చాలు. పొట్ట నిండినట్టు అనిపిస్తుంది. కాబట్టి పరగడుపున పచ్చికొబ్బరిని తినడం వల్ల ఎన్నో ప్రయోజనాలు ఉన్నాయి. లేదా బ్రేక్ ఫాస్ట్ సమయంలో తిన్నా కూడా ఆ రోజంతా తక్కువగా ఆకలి వేస్తుంది. కొబ్బరిలో కేలరీలు ఎక్కువగా ఉంటాయి. కాబట్టి దీన్ని అధికంగా తినకూడదు. మితంగా తినడం చాలా అవసరం.
Also Read: పచ్చి వెల్లుల్లిని ముఖంపై ఉన్న మొటిమలపై రుద్దితే అవి తగ్గిపోతాయా?
శరీరం హైడ్రేటెడ్గా ఉండడం చాలా అవసరం. కొబ్బరికాయ తినడం వల్ల శరీరంలో తేమ చేరుతుంది. వాంతులు, విరేచనాలు వంటివి రాకుండా ఉంటాయి. చెమట ద్వారా బయటికి పోయిన ఖనిజాలను తిరిగి నింపేందుకు కొబ్బరి ముక్క ఎంతో సహాయపడుతుంది.
కొబ్బరిలో సెలీనియం, కొమారిక్, కెఫిక్ యాసిడ్ పుష్కలంగా ఉంటాయి. ఇవన్నీ యాంటీ ఆక్సిడెంట్లు, యాంటీ ఇన్ఫ్లమేటరీ లక్షణాలు కలిగి ఉన్నవే. ఇవన్నీ మీ శరీరంలో చేరి రోగనిరోధక వ్యవస్థను బలంగా మారుస్తాయి. బ్యాక్టీరియా, వైరస్ల వచ్చే ఇన్ఫెక్షన్లు శరీరంలో చేరినా కూడా వాటితో పోరాడి బయటకు పంపే శక్తి మన శరీరానికి వస్తుంది. కాబట్టి ప్రతిరోజూ చిన్న ముక్క కొబ్బరి తినేందుకు ప్రయత్నించండి.