Spicejet : స్పైస్ జెట్ విమానానికి పెనుప్రమాదం తప్పింది. హైదరాబాద్ శంషాబాద్ విమానాశ్రయం నుంచి స్పైస్ జెట్ విమానం ఉదయం 6.20 గంటలకు నాసిక్ బయల్దేరింది. సుమారు 30 నిమిషాల ప్రయాణం తర్వాత విమానంలో సాంకేతిక లోపం తలెత్తినట్లు పైలట్లు గుర్తించారు. వెంటనే అప్రమత్తమయ్యారు. విమానాన్ని తిరిగి శంషాబాద్ విమానాశ్రయానికి తీసుకొచ్చారు. దీంతో ప్రయాణికులు ఊపిరి పీల్చుకున్నారు.
విమానం వెనక్కి రావడంతో నాసిక్ వెళ్లాల్సిన ప్రయాణికులు విమానాశ్రయంలో ఉండిపోయారు. గంటల తరబడి నిరీక్షించినా మరో విమానం ఏర్పాటు చేయకపోవడంపై ప్రయాణికులు ఆగ్రహం వ్యక్తం చేశారు. అధికారుల తీరుపై విమానాశ్రయంలో ఆందోళనకు దిగారు. అధికారుల నుంచి సరైన స్పందనలేదని ప్రయాణికులు మండిపడ్డారు.