ISRO PSLV-C54 : భారత అంతరిక్ష పరిశోధన సంస్థ -ISRO మరో శక్తివంతమైన ఉపగ్రహ ప్రయోగానికి సిద్ధమైంది. ఈ నెల 26వ తేదీన ఉదయం 11.56 గంటలకు పీఎస్ఎల్వీ-సీ54 రాకెట్ ప్రయోగం చేపట్టనుంది. శ్రీహరికోటలోని సతీష్ ధావన్ స్పేస్ సెంటర్ ఫస్ట్ లాంచింగ్ ప్యాడ్ నుంచి ఈ ప్రయోగాన్ని చేపట్టనున్నారు. ఇప్పటికే రాకెట్ లింకింగ్ ప్రాసెస్ ను ఇస్రో సైంటిస్టులు పూర్తి చేశారు. ఈ రాకెట్ ప్రయోగం ద్వారా భారత్కు చెందిన 960కిలోల .. ఎర్త్ అబ్జర్వేషన్ సాటిలైట్ – EOS-06 తో పాటు మరో 8 నానో ఉపగ్రహాలను అంతరిక్షంలోకి పంపనున్నారు.
ఎర్త్ అబ్జర్వేషన్ శాటిలైట్-06 ఓషనోశాట్ సిరీస్లోని థర్డ్ జనరేషన్ సాటిలైట్. ఓషనోశాట్-2 స్పేస్క్రాఫ్ట్ కు అప్ డేటెడ్ వర్షన్ గా సేవలను అందించనుంది. ఈ శాటిలైట్ల ద్వారా భారత తీర ప్రాంతాలకు సంబంధించిన రక్షణ వ్యవస్థపై నిఘా విస్తృతం చేయనున్నారు.
ఇక నానో ఉపగ్రహాల జాబితాలో భారత్, భూటాన్ సంయుక్తంగా రూపొందించిన భూటాన్ శాట్, పిక్సెల్ సంస్థ తయారు చేసిన ఆనంద్ శాట్, ధ్రువ స్పేస్ సంస్థ రూపొందించిన రెండు థైబోల్ట్ శాట్లు, అలాగే అమెరికాకు చెందిన స్పేస్ ఫ్లైట్ సంస్థకు చెందిన నాలుగు ఆస్ట్రోకాస్ట్ ఉపగ్రహాలు ఉన్నాయి.
పి.ఎస్.ఎల్.వి-సీ 54 ప్రయోగానికిసర్వం సిద్ధమైంది. వాతావరణం అనుకూలిస్తే శనివారం.. ఉదయం 11.56గంటలకు రాకెట్ నింగిలోకి ప్రవేశపెట్టేందుకు ఇస్రో శాస్త్రవేత్తలు సన్నాహాలు చేస్తున్నారు.