Google : ఆర్థిక మాంద్యం, ఆదాయాలు పడిపోతున్నాయన్న కారణంతో ప్రపంచవ్యాప్తంగా బడా కంపెనీలు ఉద్యోగుల తొలగింపు ప్రక్రియను భారీ ఎత్తున చేపట్టాయి. ఇప్పటికే ట్విట్టర్ 10 వేల మంది ఉద్యోగుల్ని, ఫేస్ బుక్ మాతృ సంస్థ మెటా 13 వేల మంది ఉద్యోగుల్ని, అమెజాన్ 10 వేల మంది ఉద్యోగుల్ని ఇంటికి సాగనంపేశాయి. ఇప్పుడా బాటలో గూగుల్ కూడా చేరబోతోంది. సంస్థ నుంచి 10 వేల మంది ఉద్యోగుల్ని తొలగించబోతోన్న గూగుల్… సరిగ్గా పనిచేయని వారిని మాత్రమే సాగనంపేందుకు ప్లాన్ చేసింది.
గూగుల్ మాతృ సంస్థ ఆల్ఫాబెట్లో మొత్తం 1,87,000 మంది ఉద్యోగులు పనిచేస్తున్నారు. వారిలో 10 వేల మంది… అంటే 6 శాతం ఉద్యోగులను తొలగించబోతున్నారని… పనితీరు సరిగా లేని వారిపైనే ఆల్ఫాబెట్ వేటు వేస్తోందని అంతర్జాతీయ మీడియా బయటపెట్టింది. కొత్తగా తెచ్చిన ‘న్యూ ర్యాంకింగ్ అండ్ పెర్ఫార్మెన్స్ ఇంప్రూవ్మెంట్ ప్లాన్’ సాయంతో పూర్ పెర్ఫార్మెన్స్ చూపుతున్న ఉద్యోగుల్ని తొలగించాలని… మేనేజర్లను ఆల్ఫాబెట్ ఆదేశించినట్లు సమాచారం. వచ్చే ఏడాది ఆరంభం నుంచే ఈ తొలగింపులు ఉంటాయని ప్రచారం జరుగుతోంది. ఉద్యోగులకు బోనస్లు, స్టాక్ గ్రాంట్లు తప్పించడానికి కూడా కొత్త విధానంలోని రేటింగ్స్ దోహదం చేస్తాయని అంటున్నారు. అయితే, ఆల్ఫాబెట్ మాత్రం ఉద్యోగుల తొలగింపుపై ఇంకా ఎలాంటి అధికారిక ప్రకటనా చేయలేదు.
ప్రస్తుతం ఆల్ఫాబెట్ ఒక్కొ ఉద్యోగికి ఏడాదికి సగటున 2,95,884 డాలర్లు… అంటే మన కరెన్సీలో సుమారు రూ.2.42 కోట్లు జీతం ఇస్తోంది. కానీ, సంస్థ ఆదాయం మాత్రం గణనీయంగా తగ్గింది. 2021 మూడో త్రైమాసికంలో వచ్చిన ఆదాయం కంటే… ఈ ఏడాది అదే సమయంలో వచ్చిన ఆదాయం 27 శాతం తగ్గి 13.9 బిలియన్ డాలర్లకు పరిమితమైంది. దాంతో… ఆల్ఫాబెట్లో కూడా ఆర్థిక మాంద్యం భయాలు మొదలయ్యాయని, అందుకే ఉద్యోగుల్ని తొలగించేందుకు రంగం సిద్దం చేస్తోందని అంతర్జాతీయ మీడియా వెల్లడించింది.