Blue Tick : వీలైనంత త్వరగా యూజర్ల నుంచి ఛార్జీలు వసూలు చేసి… పెట్టుబడిని రాబట్టుకోవాలని తీవ్రంగా ప్రయత్నిస్తున్న ట్విట్టర్ కొత్త బాస్ మస్క్కు… పరిస్థితులు ఏ మాత్రం అనుకూలంగా లేనట్టు కనిపిస్తోంది. నెలకు 8 డాలర్ల రుసుముతో బ్లూ టిక్ సేవలు ప్రారంభించగానే… నకిలీ ఖాతాలు వెల్లువెత్తడంతో ఆ సేవల్ని తాత్కాలికంగా నిలిపివేశాడు… మస్క్. ఇప్పుడా వ్యవహారం ఇంకా ఆలస్యమయ్యే సూచనలు కనిపిస్తున్నాయి.
బ్లూ టిక్కు నెలకు 8 డాలర్ల ఫీజు ప్రకటించి, ఎలాంటి తనిఖీలు చేయకుండా… నవంబరు 6 నుంచి సేవలు ప్రారంభించాడు… మస్క్. అయితే… చాలా మంది ప్రముఖుల పేరుతో నకిలీ ఖాతాలు వెల్లువెత్తాయంటూ భారీగా ఫిర్యాదులు రావడంతో.. కొన్ని గంటల వ్యవధిలోనే ఆ సేవల్ని నిలిపివేశాడు. నవంబర్ 29 నుంచి బ్లూ టిక్ సేవల్ని పునరుద్ధరిస్తామని ఇటీవలే ప్రకటించాడు. కానీ… ఇప్పుడు మళ్లీ మాట మార్చాడు. బ్లూ టిక్ సేవల పునః ప్రారంభం మరింత ఆలస్యం కావొచ్చని ప్రకటించాడు. ఫేక్ అకౌంట్లను అరికట్టగలమని పూర్తి నమ్మకం కలిగాకే… బ్లూ టిక్ సేవల్ని తిరిగి అందుబాటులోకి తీసుకొస్తామని మస్క్ స్పష్టం చేశాడు. అలాగే సంస్థలకు ఇచ్చే వెరిఫికేషన్ బ్యాడ్జ్ రంగును కూడా మార్చే అవకాశం ఉందని… పర్సనల్ యూజర్లు, కంపెనీల అకౌంట్లకు స్ఫష్టమైన తేడా ఉండేలా చూస్తామన్నాడు.
భారీ సంఖ్యలో ఉద్యోగుల తొలగింపే… మస్క్ అనుకున్న పనులు సకాలంలో పూర్తికాకపోవడానికి కారణమనే ప్రచారం జరుగుతోంది. కీలక ఉద్యోగుల్ని ఇష్టానుసారం పీకేయడంతో… వాళ్ల స్థానాన్ని భర్తీ చేసే వాళ్లు లేక… పనులన్నీ ఎక్కడివక్కడే పెండింగ్ లో పడిపోతున్నాయని అంటున్నారు. అందుకే… బ్లూ టిక్ సేవల ప్రారంభాన్ని కూడా వాయిదా మీద వాయిదా వేసుకుంటూ పోతున్నాడని చెబుతున్నారు. కానీ ఇవేవీ పట్టించుకోని మస్క్… గత వారం ట్విట్టర్ కొత్తగా 16 లక్షల మంది యూజర్లను సాధించిందనీ, ఇది ‘మరో ఆల్ టైమ్ హై’ అని సంబరపడుతూ ట్వీట్ చేశాడు.