Mohanbabu : సూపర్ స్టార్ కృష్ణ భౌతికకాయాన్ని చూసి నటుడు మోహన్బాబు భావోద్వేగానికి గురయ్యారు. కృష్ణ పార్థివదేహం వద్ద.. ‘సోదరా.. సోదరా’ అంటూ కన్నీటి పర్యంతమయ్యారు. అక్కడే బోరున విలపించారు. కృష్ణ సోదరుడు ఆదిశేషగిరిరావు ఓదార్చే ప్రయత్నం చేసినా మోహన్బాబు దుఃఖాన్ని ఆపుకోలేకపోయారు. అనంతరం మహేశ్బాబును హత్తుకుని ఓదార్చారు. కృష్ణ కుటుంబసభ్యులను మోహన్ బాబు పరామర్శించారు. కృష్ణ నటించిన ఎన్నో చిత్రాల్లో మోహన్బాబు ప్రతినాయకుడిగా నటించారు. ఇద్దరూ కలిసి కొన్ని చిత్రాల్లో హీరోలుగానూ నటించారు.
కృష్ణతో తనకున్న అనుబంధాన్ని మోహన్ బాబు గుర్తు చేసుకున్నారు. ఆయన మరణం తెలుగు చిత్ర పరిశ్రమకు తీరని లోటన్నారు. ఇలాంటి బాధాకర సమయంలో దేవుడు కృష్ణ కుటుంబానికి ధైర్యాన్నివ్వాలన్నారు. కృష్ణ మన మధ్య నుంచి వెళ్లిపోవడం తీరని లోటని విచారం వ్యక్తం చేశారు. తెలుగు సినీ పరిశ్రమకు సూపర్ స్టార్ అందించిన సేవలు చరిత్రలో నిలిచిపోతాయన్నారు.