డిసెంబరు నెల నుంచి ఈ వైరస్ పాజిటివిటీ రేటు పదిశాతంగా నమోదైంది. అమెరికా దక్షిణ ప్రాంతంలో ఇది 9.5%, మిడ్వెస్ట్లో 10%, పశ్చిమ ప్రాంతంలో 12% గా ఉంది. ఈ వైరస్ బారిన పడినవారు వాంతులు, డయేరియాతో బాధపడతారు. ఆహారం వల్ల అనారోగ్యానికి గురవుతారు.
ఈ వైరస్ సులువుగా, వేగంగా వ్యాప్తి చెందుతుందని సీడీసీ తెలిపింది. లైఫ్టైమ్లో ఎన్నో సార్లు ఈ వైరస్ బారిన పడొచ్చు. అయితే అవన్నీ నోరొవైరస్కు చెందిన వేర్వురు రకాలు. ఒక రకం వైరస్ మాత్రం ఇన్ఫెక్షన్ను కలగజేస్తుంది. కొన్ని రకాల నోరొవైరస్లను ఎదుర్కొనే శక్తి, రక్షణ మన శరీరం స్వయంగా కల్పించగలిగినా.. అది ఎంత కాలం ఉంటుందన్న విషయం కచ్చితంగా తెలియదు.
శీతాకాలంలో, వేసవికి ముందు ఈ వైరస్ మరింతగా ప్రబలుతుంది.
బాధితుల్లో తలనొప్పి, ఒంటినొప్పులు, డీహైడ్రేషన్ వంటి లక్షణాలు కనిపిస్తాయి. ఏటా 19 నుంచి 21 మిలియన్ల కేసులు వెలుగుచూస్తాయని సీడీసీ అంచనా. వీరిలో 1,09,000 మంది ఆస్ప్రతులను ఆశ్రయించగా.. 900 మరణాలు సంభవిస్తుంటాయి. వయోధికులు ఎక్కువగా దీని బారిన పడతారు.