Fire engulfs 2 buildings in Spanish city of Valencia(International news in telugu): స్పెయిన్‌లో మూడో అతి పెద్ద నగరం వెలెన్సియాలో ఘోర అగ్నిప్రమాదం చోటు చేసుకుంది. 14 అంతస్తుల భవనం అగ్నికీలల్లో చిక్కుకోవడంతో నలుగురు ఆహుతయ్యారు. మరో 20 మంది ఆచూకీ తెలియడం లేదు. వారంతా మరణించినట్టుగా అనుమానిస్తున్నారు. మొత్తం 15 మంది గాయపడగా.. వారిలో ఆరుగురు అగ్నిమాపక సిబ్బంది కూడా ఉన్నారు.

ఈ అపార్ట్‌మెంట్‌లో మొత్తం 138 ఫ్లాట్లలో 450 మంది నివసిస్తున్నారు. ఉధృత గాలుల కారణంగా మంటలు పై అంతస్తులకు శరవేగంగా వ్యాపించాయని స్థానికులు చెబుతున్నారు. 10నిమిషాల వ్యవధిలోనే అగ్నికీలలు పై అంతస్తు వరకు చేరాయని అంటున్నారు.

అపార్ట్‌మెంట్ ముందు భాగంలో నిర్మాణానికి వాడిన పాలియురిథేన్ మెటీరియల్ జ్వాలలు వేగంగా వ్యాప్తి చెందడానికి ఓ కారణంగా తెలుస్తోంది. 2008-09 నాటి ఈ భవన నిర్మాణంలో మంటల వ్యాప్తికి దోహదపడే అలాంటి మెటీరియల్ వాడటాన్ని పలువురు ప్రశ్నిస్తున్నారు.

హీట్ ఇన్సులేషన్‌గా పాలియురిథేన్ మెటీరియల్ మంచిదే అయినా.. మండే స్వభావం దానికి అధికం. ఈ కారణంగానే ఇప్పుడు దీనిని భవన నిర్మాణాల్లో వినియోగించడం లేదు.

Share

• 
• 
• 
• 
• 
•