Yuvathi Hulchal in Hyderabad RTC Bus: హైదరాబాద్ సిటీ బస్సులో ఓ యువతి హల్చల్ చేసింది. హయత్నగర్ బస్ డిపోకు చెందిన కండక్టర్పై.. మద్యం మత్తులో వీరంగం సృష్టిస్తూ కాలుతో తన్నింది. ఈ ఘటన ఆలస్యంగా వెలుగులోకి వచ్చింది. ఓ యువతి మద్యం సేవించి.. హయత్ నగర్ నుంచి అఫ్టల్ గంజ్ రూట్ లో వెళ్తున్న 72 నెంబర్ బస్సు ఎక్కింది. ఈ క్రమంలో చిల్లర విషయంలో కండక్టర్తో వాగ్వాదానికి దిగింది. అక్కడ నుంచి మొదలైన యువతి మాటలు.. హద్దులు మీరాయి.
కండక్టర్ ను నానాబూతులు తిడుతూనే.. చేతితో కొడుతూనే.. కాలితో తన్నింది. బస్సులో ఉన్న తోటి ప్రయాణికులు ఎంత వారించినా ఆమె పట్టించుకోలేదు. తాను ఉన్నత కుటుంబానికి చెందిన వ్యక్తినంటూ.. కండక్టర్, డ్రైవర్ ఫోటోలను తన సెల్ఫోన్లో తీసింది. మహిళ అనే గౌరవంతో సదరు కండక్టర్, డ్రైవర్ సంయమనం పాటించారు. ప్రస్తుతం ఈ వీడియో నెట్టింట హల్చల్ చేస్తోంది. ఈ వీడియో చూసిన నెటిజన్లు.. ఆ స్థానంలో ఒక అబ్బాయి ఉండి ఉంటే ఇంత ఆలోచించేవారా ? అని ప్రశ్నిస్తున్నారు.