Unemployment : దేశంలో ఎలక్షన్ సీజన్ ముంచుకొస్తోంది. 4, 5 నెలల్లో సార్వత్రిక ఎన్నికలు జరగనున్నాయి. మరి ఎన్నికల ప్రచారంలో ఏ అంశం ప్రధానం కానుంది. సగటు ఓటరు దేనిని ప్రధాన సమస్యగా భావిస్తున్నాడు? 24,192 మందిని ఓ సంస్థ సర్వే చేయగా.. నిరుద్యోగమే అసలు సిసలు సమస్య అని కుండబద్దలు కొట్టారు.
అక్టోబర్ 2022 నుంచి సెప్టెంబర్ 2023 వరకు అర్బన్ ప్రాంతాలకు చెందిన 18-54 ఏళ్ల వయసున్న వారి అభిప్రాయాలను ఆన్లైన్ ద్వారా ఆ సంస్థ సేకరించింది. ఎన్నికల్లో నిరుద్యోగమే ప్రధాన సమస్యగా నిలవనుందని 52% అభిప్రాయపడ్డారు. విద్య(45%), పేదరికం(39%), పర్యావరణం(37%) ఆరోగ్యం-సామాజిక భద్రత(36%) వంటి అంశాలు ఆ తర్వాతి స్థానాల్లో నిలిచాయి.
నేరాలు(35%), క్లైమేట్ ఛేంజ్(34%), మతపరమైన అల్లర్లు(34%) వంటి అంశాలూ కీలకం కానున్నాయని రెస్పాండెంట్లు చెప్పారు. ఆర్థిక పరిస్థితులతో పాటు ధరలు, ద్రవ్యోల్బణం ప్రధాన సమస్యగా భావిస్తున్నవారు మూడోవంతే ఉన్నారు. వచ్చే ఎన్నికల్లో అవే కీలకం కానున్నాయని 33% మంది అభిప్రాయపడ్డారు.