Ileana: ప్రస్తుతం మాతృత్వాన్ని ఎంజాయ్ చేస్తోన్న గోవా బ్యూటీ ఇలియానా.. ప్రసవం తర్వాత ఎదురైన ఇబ్బందులను తాజా ఇంటర్వ్యూలో వెల్లడించారు. ప్రసవం తర్వాత తీవ్రమైన డిప్రెషన్లోకి వెళ్లినట్లు ఆమె తెలిపారు. ‘‘ప్రసవం తర్వాత కొందరు డిప్రెషన్లోకి వెళ్తారన్నది వాస్తవం. నేను కూడా అలాంటి పరిస్థితులను ఎదుర్కొన్నాను. ప్రసవానంతరం తీవ్రమైన ఒత్తిడికి గురయ్యాను.
గదిలో నుంచి బయటకు వచ్చేదాన్ని కాదు. అయితే ఇంట్లో నాకు మంచి సపోర్ట్ ఉన్నందుకు సంతోషిస్తున్నాను. వాళ్లు నాకు ఏ కష్టం కలగకుండా చూసుకున్నారు. ఇంత మంచి భాగస్వామి దొరికినందుకు చాలా సంతోషంగా ఉంది. అతనికి నేను ఏం చెప్పాల్సిన అవసరం లేదు.. నన్ను విశ్రాంతి తీసుకోమని చెప్పి ఆ తర్వాత తనే బిడ్డను చూసుకుంటూ ఉంటాడు’’ అంటూ ఆనందం వ్యక్తం చేశారు.
కాగా గతేడాది ఆమె పెళ్లి కాకుండానే ప్రెగ్నెన్సీ ప్రకటించి అందరికీ షాక్ ఇచ్చిన విషయం తెలిసందే. ఆ తర్వాత ఆగస్టులో పండంటి బిడ్డకు జన్మనిచ్చింది. ఇటీవల తన బాయ్ ఫ్రెండ్ తన బిడ్డకు తండ్రి అయిన మైఖేల్ డోలన్ను అందరికీ పరిచయం చేసింది ఈ గోవా బ్యూటీ.