Shubman Gill : 2023 వరల్డ్ కప్ ఫైనల్ మ్యాచ్ తర్వాత నుంచి శుభ్ మన్ గిల్ ఆట లయ తప్పింది. తర్వాత ఆడిన ఏ మ్యాచ్ లో కూడా ప్రభావం చూపలేకపోతున్నాడు. ఇది తనలోని ఆత్మవిశ్వాసాన్ని దెబ్బతీస్తోందని పలువురు వ్యాఖ్యానిస్తున్నారు. సలహాలిచ్చే సీనియర్లు కూడా గిల్ ని టార్గెట్ చేయడం సరికాదని అంటున్నారు.
భారత జట్టులో తీవ్రమైన పోటీ ఉంది. ఈ సమయంలో జట్టుకి బలంగా ఉండాలి తప్ప, బలహీనంగా మారకూడదని సీనియర్లు వ్యాఖ్యానిస్తున్నారు. వన్డేలు మినహా టెస్టు, టీ20 ఫార్మాట్లో తేలిపోతున్నాడని సంజయ్ మంజ్రేకర్ అన్నాడు. భారత్ జట్టులో ఉండే తీవ్రమైన పోటీనీ అర్థం చేసుకుని నిలకడగా పరుగులు చేయాలని సూచించాడు.
గిల్ బ్యాటింగ్పై సీనియర్ క్రికెటర్ సునీల్ గవాస్కర్ మాట్లాడాడు. టెస్టు క్రికెట్ ఆడుతున్నామనే విషయాన్ని దృష్టిలో ఉంచుకొని గిల్ నెమ్మదిగా ఆడాలని అన్నాడు. ప్రతి బాల్ ని ఫ్లిక్ చేయాలనే దృష్టితో ఆడుతున్నాడని అన్నాడు. టెస్ట్ మ్యాచ్ అనేది దూకుడుగా ఆడే ఆట కాదని అన్నాడు. టీ20, వన్డే ఫార్మాట్లతో పోలిస్తే టెస్టు ఫార్మాట్ పూర్తి భిన్నమని అన్నాడు. అవి ఎక్స్ ప్రెస్ టైప్ లో ఆడితే, ఇక్కడ పాసింజర్ లా ఆడాల్సి ఉంటుందని అన్నాడు.
వికెట్టు కాపాడుకుంటూ ఎన్ని బాల్స్ ఆడామన్నది మన అనుభవానికి నిదర్శనమని, మన ఓపికకు పరీక్షని తెలిపాడు. వైట్ బాల్ కంటే.. టెస్ట్ మ్యాచ్ ల్లో ఆడే రెడ్ బాల్ గాలిలో కాస్త ఎక్కువగా కదులుతుంది. బౌన్స్ కూడా ఎక్కువగా లభిస్తుంది. అది మైండ్లో ఉంచుకొని బ్యాటర్లు ఆడాల్సి ఉంటుందని అన్నాడు.
సీనియర్ క్రికెటర్ దినేశ్ కార్తీక్ కూడా గిల్ ఆట తీరుపై స్పందించాడు. దేశవాళీ క్రికెట్ లో సర్ఫరాజ్ ఖాన్, రజత్ పటీదార్ భారీగా పరుగులు సాధిస్తున్నారని అన్నాడు. వీరు గిల్ ప్లేస్ కోసం కాచుకుని కూర్చున్నారని, వీరే తనకి బలమైన పోటీదారులని అన్నాడు. ఇవన్నీ గుర్తుపెట్టుకొని గిల్ రెండో టెస్ట్ ఆడాల్సి ఉంటుందని అన్నాడు.
టెస్ట్ మ్యాచ్ లో సగటు 30కి అటుఇటుగా ఉంటే జట్టు మేనేజ్మెంట్ ప్రత్యామ్నాయాలపై దృష్టి పెడుతుందని హెచ్చరించాడు. మొత్తానికి గిల్ గొప్ప ఆటగాడు కావడంతోనే అందరూ ప్రేమతో చెబుతున్నారనే సంగతి తను గ్రహించాలని సీనియర్లు ఈ సందర్భంగా వ్యాఖ్యానిస్తున్నారు.