PSLV-C58 Count down
PSLV Countdown: పీఎస్ఎల్వీ-సి58 ప్రయోగం నేపథ్యంలో తిరుమల శ్రీవారిని ఇస్రో శాస్త్రవేత్తలు దర్శించుకున్నారు. వీఐపీ బ్రేక్ దర్శన సమయంలో స్వామివారి సేవలో పాల్గొన్నారు. పీఎస్ఎల్వీ-సి58, ఎక్స్పోశాట్ నమూనా చిత్రాలను శ్రీవారి పాదాల చెంత పెట్టి ప్రత్యేక పూజలు చేశారు.
కొత్త ఏడాది తొలి రోజే పీఎస్ఎల్వీ-సి58 ప్రయోగం చేపడుతోంది. PSLV వాహకనౌక మనదేశానికి చెందిన ఎక్స్-రే పొలారిమీటర్ ఉపగ్రహం ఎక్స్పోశాట్ను అంతరిక్షంలోకి మోసుకెళ్లనుంది. శ్రీహరికోటలో ఇవాళ ఉదయం 8.10 గంటలకు కౌంట్డౌన్ ప్రారంభమైంది. సోమవారం ఉదయం 9.10 గంటలకు పీఎస్ఎల్వీ-సి58 వాహకనౌక షార్లోని మొదటి ప్రయోగ వేదిక నుంచి నింగిలోకి దూసుకెళ్లనుంది.
ఎక్స్పోశాట్ ఖగోళ శాస్త్రంలో సంచలనాత్మక పురోభివృద్ధికి బాటలు వేయనుంది. ఇమేజింగ్, టైం-డొమైన్ అధ్యయనాలు, స్పెక్ట్రోస్కొపీపై ప్రధానంగా దృష్టి పెట్టింది. ఎక్స్-రే ఖగోళ శాస్త్రానికి ఒక కొత్త కోణాన్ని పరిచయం చేస్తూ, ఎక్స్-రే మూలాలను అన్వేషించడం ఎక్స్పోశాట్ ఉద్దేశం. ఈ ఉపగ్రహ జీవితకాలం ఐదేళ్లు. PSLV చివరి దశ మరో పది పరికరాలను అంతరిక్షానికి మోసుకెళ్లనుంది.